خان توركم...
دئديلر سانكي منه پان توركم!
من دئديم سهو ائله ديز خان توركم
ائليمين دوشمنينه اوخ سونگو
ائليمين دوستونا من جان توركم
شانلي تاريخيم اولوب كئچميشده
ائله ين دونياني حيران توركم
گون به گون شانيم اوجالماقدادي چون
شانلي دورانه گيرن شان توركم
منه جان جان دئيه نه جان جان تورك
منه قان قان دئيه نه قان توركم
داييم انسانليق اولوب آماليم
انسانا سايقيلي انسان توركم
دده مين اوغلويام ايلكين گوندن
دده مي من تانياندان توركم
منه يولسوز دئمه سين يولسوزلار
يولوم آيديندي من اعيان توركم
بير گون اولدومسا سومئر، بير گون ماد
من اورارتو ايله مهران توركم
بير گون ايلامدا من اولدوم مدني
ماننايام قوتتييم اشكان توركم
اسلامين بير زامان اولدوم قيليجي
اسلاما جارچي مسلمان توركم
منه يولسوز دئيه نه ذولفقارام
سالارام مولكونه طوفان توركم
سلجوقام غزنوي يم من صفوي
افشارام درك ائله شيروان توركم
پارچا پارچا اولور آذربايجان
سانكي من بوردا سيخيلقان توركم
خراساندان قوما، قومدان خليجه
اصفهان شوش طبرستان توركم
لوت كويرينده سوسوز قالسام دا
بير ياشيل اؤلكه ده گيلان توركم
كرمان اولموشدو منه تورك وطني
چارماحال ايله خوزستان توركم
باخ او تنگستانين اوغلانلارينا
باخ خزر ساحلي توركمان توركم
گيروه كوردستانا پاي اولموشسا
آتمارام قزويني تهران توركم
ايندي ياد اوغلو منه ياد دئمه سين
گؤزو گؤرسون بوتون ايران توركم
تولكو آسلان ايله گيرمز ساواشا
گئري دورسون كي من اسلان توركم
بير قيغيلجيم اونا اود پوسگورسم
دودماني گئدر آسان توركم
عاقل انسان كي دولاشماز توركه
يوخسا من يوردونا وولكان توركم
وطنيم يادلارا يورد اولماياجاق
وطنيم ايچره خورامان توركم
يوردومون تورپاغينا گؤز تيكه ني
ائله ين گونده هراسان توركم
وطنيمدير وطنيمدير وطنيم
وطنيم آذربايجان توركم...
